مليش نفس اكتب من اللى عمال يحصل ومن ردود افعال سى حسنى  منه لله منه لله

مش لاقى كلام اقوله من الفرحه خلاص النظام فى ساعاته الاخيره وهيرحل ويرحنا من قرف امه النظام اللى مفيش خروف واحد فيه من 4 ايام طلع قال حاجه تلاقيهم كانوا مشغولين بتجميع فلوسهم ودهبهم عاوزين يهربوا قبل ما الشعب يمسكهم يالا فى 60 الف سلامه 

نظام مفهوش واحد ممكن نقول عليه عشان الراجل بيطلع يتكلم ويواجه لكن دول خرفااااااااااااان وشويه حراميه 

ثورة ثورة حتى النصر

الحمد لله

خلاص قطعوا النت عن  مصر كلها ورسايل الموبايل اللى بتتبعت مش بتوصل سواء جوه مصر او مبعةته بره مصر 

الاخبار قلت كتير اوى بنسبه 90% معدش فى غير الاعلام وطبعا مش هيجيب حاجه القلق ركبنى من ساعه ما عرفت مش عارف ليه  وبعدعى ربنا يعدى اليوم ده على خير لمصر كلها وكمان فى كلام بيتقال انهم هيقطعوا خطوط التليفون الارضى والموبايل وفى غياب الانترنت والاتصالات وطبعا الاعلام غايب من الاول هيبقى قدام الحكومه  فرصه انها تنتقم من اللى الناس عملوا فيهم على مدار 3 ايام من البطولات من المصريين بس انا عارف ان الشعب مش هيسكت ولا هيخاف وهيقف للحكومه بس الخوف ان لو حصل احتكاكات وشغب هتبقى دمويه مش هيكون فى رحمه لامن الامن ولا من الناس النهااااااااااااارده هيكون يوم تاريخى لمصر يوم فاصل نكون او لا نكون 

ربنا يسترها عليكى يا مصر وربنا يوفق المصريين

ثوره ثوره حتى النصر

 

 

ياااااااااااااااااااه على قد ما كنت فرحان باليوم ده على قد ما كنت بتقطع من جوه عشان انا مش موجود فى مصر 

كان نفسى اكون كوجود واشارك وانزل الشارع ومرجعش بيتنا الا وانا واخد حقى من النظام الطالم الفساد

الناس اللى كانت بتشكك فينا وفى شباب الفيس بوك انهم يعملوا حاجه خدوا صدمه كبيره اوى اوى اوى

واحنا كمان خدنا صدمه عشان محدش كان متوقع الاعداد المهوله ديه كلها تنزل تقول الشعب يريد اسقاط النظام

بس الحمد لله ربنا وفقنا وخلاص من يوم 25 يناير 2011 الوضع اتغير بقه لينا صوت عالى اوى ويتعمله الف حساب 

ولسه النهارده وعلى قد ما كان فى قمع وعنف من الامن واستخدام للبلطجيه  والاعتقالات اللى عدت 100 رااااااااااااجل 

محدش خاف ولا حد كش كله نزل بالعمس كل ما كان بيزيد القمع من الامن كانت الناس بتزيد فى الشوارع 

السويس وابطال السويس طول عمر السويس بتدينا دروس فى النضال والكفاح تحيه ليهم ولكل راجل واقف فصاد النظام

تحيه لكل شاب وكل بنت وكل فرد كبير او صغير بيشارك فى الثوره

حريه   حريه   حريه

خلاص يا بلادى فات الكتير واللى باقى قليل من النهارده مفيش خوف مفيش وانا مالى  من النهارده هتكلم هقول لاء لكل ظالم لكل حاجه بتيجى عليا انا بحبك وعشان بحبك هقول لا لكل ظالم مليش دعوه باحزاب جبانه هدفها ترضى النظام مش الشعب  مليش دعوه بناس بتخاف انتى بلدى حببتى وروحى من النهارده هتكلم وهصرخ مش هسكت تانى خلاص 

بحبك يا بلادى بحبك وحياتى تهون فى سبيل حريتك 

يا رب يوم 25 يناير يبقى يوم لعزه مصر يبقى يوم الشعب كان نفسى اكون فى مصر اليوم ده عشان اقول لا يا حسنى كفايه عليك بقه كده كفايه يا نظام  امشوا بقه بنكرهكم بنكرهكم بنكرهكم مش عاوزنكم ارحلوا بعيد عننا

انتوا هتمشوا واحنا اللى باقين احنا الاصل احنا مصر مش انتم خلاص الناس بطلت تخاف من كتر الظلم الى شايفينه خلاص يا احنا يا انتم

اللى مش هيشارك اليوم ده يبقى يستاهل اللى يحصل فيه اللى بيقول ونا مالى اوعى بعد كده تفتح بقوك وتقل اه ادام خفت خليك خايف اعد فى بيتك ومتفتحش بقك  باى كلام 

التونسه هيطلعوا يوم 25 يناير فى مظاهره عند السفاره المصريه عشان مصر والاردنين كمان 

باله عليك مش مكسوف من نفسك وانت بتقول من خاف سلم يا ميت خساره على الرجاله اللى الرسول بيقول عليهم خير اجناد الارض 

يا ميت خساره على الرجاله يا ميت خساره بس هلى بالكم انتوا كده مش رجاله عارفين ليه عشان الراجل ميخقش الراجل ميرضاش بالذل 

يا رب  يا رب يارب وفقنا يوم 25 يناير    

برده هتكلم عن السلبيه الموضوع ده مسيطر عليا يمكن عشان الاحداث اللى موجوده الوقتى واللى هتحصل الفتره الجايه

النهارده يا جماعه فى 5 حاولوا يولعوا فى نفسهم وفى واحد مات فى اسكندريه ربنا يرحمه ويغفرله توقعت ان الناس هتنزل

تعترض او تقول اى حاجه بس الغريب انه مفيش حد نزل غير بنت و3 شباب من شباب 6 ابريل 

وده الفيدو بتاع البنت بعد ما رجعت

  

http://www.youtube.com/watch?v=EXbX85xVHYU

 

تخيلوا بنت هيا اللى تنزل الاول وتسيب رقمها عشان لو حد عاوز يشاركها وميلحقهاش غير 3 شباب

4 شباب بس اللى طلعوا من القهره عشان الشاب اللى مات والناس اللى بتولع فى نفسها وكان فى انتظارهم عربيات امن مركزى 

ولا حد اتحرك ولا حد فكر يعمل حاجه للدرجه دى بقينا سلبين ومعدش عندنا احساس واوعى حد يقولى لا فى احساس عشان هقوله انت كداب 

عشان لو فى حد عند احساس او لسه ممكن نقول عليه بنى ادم كان اتحرك ولا عمل حاجه الناس خلاص بقه عندها لامبالاه  وتلامه فالحين بس يشتكوى من حال البلد 

والله انا لما عرفت انه اتوفى الله يرحمه عنيا دمعت واتمنيت اكون فى مصر عشان انزل الشارع واعمل حاجه 

يااااااااااااااااااااااريت اللى يقدر ينزل يوم 25 يناير ينزل ومايخفش ما هيا خربانه خربانه هتخافوا من ايه بقه 

وياااااااااااااااااااااريت ننشر الموضوع ده على قد ما نقدر بلاش السلبيه بتاعتكوا ديه

السلبيه على قد ما هيا كلمه صغيره بس بيجى من وراها مصايب ومشاكل وبلاوى 

الناس اللى بتشتكى من احوال البلد ومن المشاكل والقرف اللى هما عايشين فيه وبشتكى من الظلم والاهانه والاستعباد مسألتش نفسها لييييييييييه الحكومه بكل اجهزتها بتهنا وبتذل فينا ومش بتحل مشاكلنا ؟؟؟؟

االحكومه هيا السبب فى اللى بتعملونا فينا بس مش الحكومه لوحدها لا احنا كمان السبب بالعكس يمكن احنا السبب الرئيسى فى ده عارفين ليه عشان احنا اللى ساكتين على الذل والاهانه احنا اللى حطين الجذم فى بقنا ومش بنتكلم فالحين بس نعد نتكلم وندعى على الحكومه باختصار سلبيتنا هيا اللى وصلتنا للى احنا فيه الوقتى

ايوه لازم كلنا نعترف بكده ازاى نبقى عاوزين اوضعنا تتحسن والحكومه تتقى الله فينا واحنا سايبنهم يعملوا اللى عاوزينه مش االمثل بيقول السكوت علمت الرضا طيب يبقى الحكومه مغلطتش فى اللى بتعملوا عشان احنا اللى ساكتين واحنا اللى اديناها الفرصه لكده 

متهيألى كفايه كده بقه لازم نقول لا للظلم والذل والاستعباد احنا مش عبيد ولا مواطنين درجه تانيه لازم كل واحد فينا ينزل الشارع يوم 25 يناير ويقول كفايه كده يا حسنى اتقى الله فينا لازم نقوله لو فاكرنا هنفضل كده على طول تبقى غلطان كل انسان وليه طاقه واحنا استحملنا كتير وخلاص جبنا اخرنا 

حد يقدر يقولى احنا هنخسر ايه اكتر من اللى خسرناه يعنى لو نزلنا الشارع وقولنا لا ايه اللى هيحصل هيضربوا فينا هيحبسونا ايه الفرق بين كده وبين العيشه اللى كلها ذل واهانه وقرف ولو حتى ده محصلش وموتنا مش هيبقى ارتحنا من الدنيا باللى فيها مش هنموت شهدا ونرتاح بقه 

فكروا ولو مره واحده صح خليكى

الله اكبر من كل ظالم وحاكم مستبد 

عاشت تونس الحره...عاش الشعب الحر 


عاشت تونس الحره ... وعاش شعب الابطال


الله اكبر الله اكبر عملتها تونس وقدرت تطرد الضاغيه زين العابدين وهرب بره تونس زى كل جبان  ...


بجد مش عارف اقول من الفرحه كل اللى بفكر فيه ان لسه فى امل لو الشعب عاوز حاجه هيعملها  لو وقفنا كلنا وقفه راجل واحد هنعملها هنحرر مصر من الظلم والاستبداد اللى فيها هنعملها زى ما شعب تونس عملها لازم الشعب التونسى يكون قدوه لينا ...
لازم يكون قدروه لكل انسان دمه حر وبيغير على بلده وميرضاش بالظلم عاشت تونس  وعاش شعبها الحر ياارب احنا كمان نتعلم من الدرس ده يا رب نقدر نقول لا بجد ومنفضلش كتمنها جوه صدورنا احنا مستنين ايه تانى مش عارف ...


عاشت تونس      عاشت تونس      عاشت تونس

هو احنا ليه كده مش بنثور ولا بنتحرك


الجزاير قامت فيها المظاهرات عشان غلاء الاسعار 


تونس مولعه نار واستبسال من الشعب التونسى بسبب البطاله


مورتنيا دخلت معاهم فى الخط 


لبنان اسقطت حكومه سعد الحريرى 

الاردن وليبيا خافوا من الشعب ومرفعوش الاسعار 


طيب احنا ليه بقه كده احنا عندنا غلاء اسعار ومع ذلك ساكتين  عندنا بطاله والشباب ضايع وساكتين  عندنا فساد وسرقه وساكتين  كرامتنا متهانه وملناش سعر لا جوه مصر ولا بره وبرده ساكتين وحطين الجذمه فى بقنا ليييييييييييييييييييييييييييه
هو احنا مش بشر ولا بنى ادمين ولا احنا فقدنا احساسنا خلاص ومبقاش يهمنا حاجه غير ان احنا عايشين وخلاص عايشين ازاى ولا عشان ايه مش مهم طيب لييييييييييييييه ساكتين على كل ده ليه مش بنقول كفاااااااااااااااااااااايه حراااااااااااااااااااااام يا حكومه ميرضيش ربنا اللى بيحصل ده ليييييييييييييييييييه ...
انتوا فين يا ناااااااااااااااااااااااااااااااااااااس معتقدش ان سكوتكم ده جاى من الرضا محدش راضى عن حاله ولا عن حال البلد الكل نفسه يتكلم ويقول لا يا حكومه ارحمينا بقه طيب مش بتقولوا كده ليه هو ده خوف من بعبع الحكومه ولا السلبيه وصلت بالناس لدرجت انهم عاوزين اللى جيبلهم حقهم وهما قاعدين فى البيت بيتفرجوا على ميييييلودى  ولا ايه السبب بالظبط 
ماهو طول ما انتوا ساكتين مفيش حاجه هتتغير هيفضل الوضع زى ما هو

هبدا كلامى زى بلال فضل ما بيقول فى برنامج عصير الكتب

بسم الله الرحمن الرحيم يا مسهل يارب

طبعا ديه اول تدوينه ليا ويااااااااااااارب متكنش الاخيره الحقيقه مش عارف ابدا منين ولا اتكلم عن ايه اتكلم عن اخر حاجه وتفجير كنيسه القديسين ولا اتكلم عن الحكومه والحزب الوثنى الديموقراطى ولا اتكلم عن الشباب ومشاكلنا البطاله والادمان ولا الفراغ والوساطه ولا الشباب اللى حلمهم الوقتى يطلعوا بره مصر يروحوا اى حته يمكن يلاقوا عيشه كريمه ...

مع انى المثل بيقول من خرج من داره اتقل مقداره بس تفتكروا المثل ده الوقتى ينفع نطبقه عندنا فى مصر معتقدش اذا كان احنا ملناش مقدار ولا سعر جوه بلدنا فى دارنا حياتنا فى مصر ارخص بكتير من اى حاجه تانيه لما شاب معملش حاجه ولما الشرطه بتقبض عليه ويسال انا عملت ايه يقوم يضربوه لحد ما يموت ( ربنا يرحمك ويغفرلك يا خالد يا سعيد ) ولا لما يتصلوا بشاب تانى  تعالى عاوزينك فى كلمتين بخصوص تفجيرات اسكندريه ويرجع جثه هامده ( ربنا يرحمك يا سيد يا بلال ) لما ابقى ماشى فى الشارع واتشد اشتباه واروح القسم والاقى حضره الظابط مجهزلى محضر باى حاجه سلاح ابيض ولا ورقه بانجو ولا شريط كيميا ويقولى امضى يا اشول هو ده ينفع هو ده اسمه كلام يا ناااااااااااااااس  بجد حرام اللى بيحصل فينا ده دا احنا شباب احنا اللى الامل فينا احنا اللى هنشيل البلد ديه بعد كده المفروض تراعونا اكتر من كده .....منك لله يا حكومه منك لله

لما يوصل الحال بالشباب ان يعرض حياته للخطر ويستلف ويجمع فلوس عشان يروح ايطاليا ويترموا فى البحر ويا عالم هيوصلوا ولا لاء ولو وصلوه هيتمسكوا ولا هيعدوا وبعد ما يعدوا ايه هيكون مصيرهم ليه كده عشان الظلم عشان محدش بيحس بيه ولا بهمومه 

عشان ملوش تمن ولا سعر فى مصر يبقى يشوف حاله بره مصر...

يبقى تفتكروا بعد كده مقوله من خرج من داره اتقل مقداره لا كده المقوله اتغيرت بقت من خرج من داره زاد مقداره

يمكن اكون صح ويمكن اكون غلط بس ده حالنا احنا الشباب ده اللى بيفكر فيه الشباب الوقتى ازاى يهج برررررره مصر