من غير مقدمات ورغى كتير انا هدخل فى الحوار على طول
قالك الجيش والشعب ايد واحده والجيش حما الثورة كلام جميل بس محتاج شويه تفكير عشان نعرف الكلام ده صح ولا غلط
الجيش لما نزل ايام االعتصام فى التحرير كان دوره (محايد) سايب الناس معتصمين بس فى نفس الوقت سايب البلطجيه وظباط قمل الدوله طايحين فى الثوار ولما حد يجى يكلم الجيش يقولك احنا محايدين.
كمان بعد ما المخلوع اتخلع ودخلنا فى قصه الاستفتاء دستور جديد ولا تعديل (بصرف النظر عن اللى حصل فى الاستفتاء) الناس اختارت التعديلات واذ فجأتا نلاقى اعلان دستورى بحاجه تالته خالص ،طيب الاستفتاء اللى حصل ده ليه وكانت ايه الفايده منه مش عارف برده.
كمان نيجى بعدها هما فين بتوع النظام البائد سايبينهم ليه بره السجون لمده شهرين مفيش رد واذ فجأتا برده نلاقيهم بيلومهوم فى طره لاند طيب سايبينهم ليه كل المده ديه قالك اصل كنا بنجمع ادله عشان اللى يتقفش ميبقاش ليه مخرج وهب نلاقى الرجاله بياخدوا اخلائات سبيل واحد وره التانى اوبا ايه اللى بيحصل ده وازاى ياعم الحج الناس يخرجوا قالك ما هو اخلاء سبيل مش معناه براءه دا القضيه لسه شغاله اه طيب فين محاكمتهم على الفساد السياسى اللى كان فى البلد قالك مفيشفى قانون العقوبات ما يجرم الفساد السياسى طيب خلاص يبقى نحاكمهم محاكمات عسكريه مفيش رد بردهطيب.
طيب بخصوص المحاكمات بقه هيا ليه ماشيه ناس وناس يعنى نلاقى اللى بيتظاهروا بيتقبض عليهم ويتحاكموا عسكرى ليه كده بس يا عم الامور ونلاقى اللى خربوا البلد بيتحاكموا مدنى وفى تهم ماليه بس !!! وبرد الناس اللى اقتحمت كنيسه امبابه نلاقيهم يتحاكموا مدنى !!! طيب لما هيا كده ليه مش بتحاكموا المتظاهرين مدنى وبرده ولا انتوا ليه اصلا تقبضوا عليهم عيب كده فين اخلاق الثورة.
نيجى بقه لحوار الفتنه الطائفيه واللى فيها العجب العجاب ناس بتحاصر كاتدرائيه ومحدش يقولهم انتوا بتعملوا ايه !!! ايه ده عادى كده اروح احاصر كاتدرائيه واهدد باقتحامها والجيش بيتقرج عليا ويجى يقولى معلش روح النهارده وانا هبقى اجبلك اختك كاميليا !!!!!!!!
وبعدها نبص نلاقى موقعه امبابه شرب نا روحرق كنيسه و15 فتيل والجيش والشرطه بيتفرجوا فعلا الجيش والشعب ايد واحده ونلاقى اللى اتقبض عليهم بيتحاكموا مدنى لالالالالالالالالالالالا انت اكيد بتهزر دا طانت هتولع وانت رايح تحاكمهم مدنى هو مفيش غير الثوار اللى بيتحاكموا عسكرى .
طيب بلاش كل ده نتكلم فى حاجه تانيه الاعلام والرقابه اللى مفروضه على الاعلام ليه هو احنا عملنا ثورة ليه مطلب اساى من مطالب الثورة حريه ازاى بقه تيجوا تقطعوا البرنامج على بثينه كامل عشان ايه عشان انتقدت المجلس العسكرى وفيها ايه انت مش رفضت مجلس رئاسى وقولت هتدير انت البلد يبقى تستحمل النقد لحد ما دورك يخلص انت اللى اخترت مش احنا اللى اجبرناك، دا الغير الفزاعات بتاعت الاقتصاد اللى موجهين الاعلام ليها وفزاعه السلفيين وفزراعه الامن اللى انتوا سايبنهم .
طيب نتكلم على حركه المحافظين اللى اتعملت بنفس الطريقه وبنفس المنطق الغبى صباح الخير البلد حصل فيها ثورة اه والله لو مش مصدفنى ابقى اسال اى حد فى الشارع هيقولك.
خلاصه الكلام احنا عملنا ثورة ولينا مطالب لسه متحققتش لازم تتحقق مش هنقبل غير كده 840 شهيد دمهم مش هيروح هدر ال 1200 المصابين فى عينهم اللى مش لاقين حد يعالجهم برده حقهم مش نسيبه دا غير 5000 مصاب التانين مش هنسيب حقوقهم ولا هنقبل بحكم عسكرى الدوله هتكون مدنيه
اللى شايف الجيش والشعب ايد واحده يبقى يرد عليا....
